Kryefamiljari në Korçë, ka rrëfyer orët e ankthit që ka përjetuar së bashku me bashkëshorten, pasi u grabitën nga maskat. Foni Rapo ka thënë në një prononcim për mediat se ai ka qenë duke darkuar me bashkëshorten, kur dy persona të maskuar i ishin futur në shtëpi.
Ata i kishin kërcënuar, e më tej dhunuar. Kryefamiljari tregon më tej se e kishin goditur me qytën e pistoletës në kokë, e ndërsa gruan e tij në krahë dhe në këmbë.
“Ishim duke ngrënë bukë. Ishte 8 pa 10. Dy persona me maskë, armë dhe thikë u futën menjëherë brenda nga dera e banesës ngjitur. Ishin me armë, pistoletë, kishin dhe një thikë.
Na kërcënuan dhe goditën, kërkonin lek, më morën pensionin dhe kursimet. Mua më goditën me qytën e pistoletës në kokë, ndërsa gruan Afërdita në krahë dhe këmbë. Ime shoqe është në spital. E goditën shumë me shishe, dhe mua më goditën. Gjatë gjithë kohës bërtisnin lekët, lekët. Në fund iu thashë; merri lekët e pensionit”, tregon ai.
Grabitësit, pasi u kanë bërë presion çiftit të moshuar, u kanë dhënë edhe lekët që mbanin rezervë. Ai thotë më tej se bëhej fjalë për rreth 1 milion lekë.
“Thoshin të tjerat. Në fund iu thashë; merri lekët e rezervës. Këto kisha unë. Afro 1 milion mund të ishin. Mua më lidhën dorën, se unë desha që të dilja, mirëpo dera ishte e mbyllur dhe më zunë atje. Ata do kenë hyrë nga shtëpia këtej, ngjitur. Nuk kemi ndjerë asgjë kur hynë. Ishin të maskuar komplet. Vetëm leka, leka. I thashë është një unazë në sirtar, merreni i thashë. Thoshin që kemi ardhur nga Elbasani, e përdorën pak dialektin, por jo tamam. Ndoshta për të humbur gjurmët. Mos lajmëro më tha mua”, rrefen burri.
Maskat dhunojnë çiftin e moshuar në banesë, zbardhet shuma që morën autorët (foto)
