Ambientalisti Sazan Guri është kërcënuar me armë nga disa persona, pasi ka qenë sot gjatë protestës së banorëve në Laknas. Për ‘Faxnews’ ai ka treguar se është kërcënuar me armë nga disa persona të cilët dolën nga një makinë e llojit ‘Toyota’.
Ai thotë se nuk i ka frikë, pasi është thjesht ndërmjetës në këtë histori. Guri u kërcënua pas takimit me kryebashkiakun Rakip Sulin. Personat që e kanë kërcënuar, sipas tij, janë nipërit e njërit prej administratorëve të kompanisë. Ai madje ka treguar se e kanë çuar në gjyq. Duket se historia e kërcënimeve është e përsëritur, pasi një gjë e tillë i ka ndodhur edhe me një person tjetër.
‘Jam kërcënuar me armë, një makinë Toyota e kuqe ku disa të rinj kanë nxjerrë armën dhe ma kanë tundur në xhamin e makinës. Familjarët e mi po ta marrin vesh ata këtë gjë do jenë të prekur. Zoti më ndihmon që të jem i fortë, kështu që nuk më kërcënojnë dot, nuk i kam frikë. Por ata duhet t’i vënë gishtin kokës që unë jam thjesht një ndëmjetës. Janë nipërit e Bledar Dacit që është administrator i kësaj kompanie. Më kanë hedhur edhe në gjyq, po si mund të hidhet një avokat në gjyq? Madje që dje më ka kërcënuar një person me mjekër, i gjatë i fuqishëm”, tha Sazan Guri.
