Kryedemokrati Basha ka folur sot në ‘Opinion’ për deklaratën që bëri kreu i shtetit, Ilir Meta pak ditë më parë, kur tha se e çdekretoi datën e zgjedhjeve të 30 qershorit, pasi kishte marrë premtim nga Basha se opozita do hynte në zgjedhje.
“I shtyva që të bënim zgjedhje gjithëpërfshirëse, kam marrë fjalën nga z. Basha që do hyjnë në zgjedhje, pastaj mbajtën atë qëndrimin ashtu e kështu…”, tha kreu i shtetit, Ilir Meta.
Por për liderin e opozitës, kjo nuk është e vërtetë. Ai tha se nuk do të komentonte deklaratat e presidentit. Por tha se Meta veproi për të shmangur konfliktin dhe përplasjen, pasi KQZ ishte nën urdhrat e Ramës.
“Unë s’jam këtu për të komentuar deklaratat e presidentit, por një gjë është e qartë, presidenti veproi për të shmangur konfliktin e përplasjen. Bëri shumë mirë, të gjithë e dimë që KQZ ishte nën urdhrat e Ramës. Pretendimi se opozita do hynte në një proces që s’ekzistonte se dekreti i presidentit u injorua…nuk është e vërtetë që kisha dhënë premtim presidentit se zgjedhjet e 30 qershorit erdhi pas një vendimi të madh që morëm ne. Që kishte qëllim largimin e kësaj qeverie, shpërbërjen e parlamentit ilegjitim e çuarjen e vendit në zgjedhje të parakohshme”, tha Basha.
