Artistja e mirënjohur, Justina Aliaj, ka rrëfyer betejën e vështirë me Covid-19. Me gjithë lodhjen nga maska e oksigjenit, ajo tha se po sheh shenja përmirësimi, falë trajtimit dhe kurimit të duhur në këtë spital.
Aliaj ka treguar se pavarësisht shfaqjes së shenjave të para, ajo e ka neglizhuar duke menduar se kishte gjendje gripale. E prekur falë edhe përkujdesjes, artistja thotë se mjekët kanë bërë një mrekulli me të, pasi kur kishte shkuar në spital ishte tejet rëndë.
“Jam më mirë se sa ditën e parë. Nuk jam e trembur. E dua shumë popullin tim. Me dash Zoti me m’lënë, dua të them se këtu janë kujdesur jashtëzakonisht shumë për mua.
Kam parë që kanë bërë një mrekulli për mua. Nuk do i harroj kurrë deri sa të vdes. Fillimisht u tregova e papjekur, mendova që jam me grip, pra e vonova ardhjen.
Kur erdha, isha gati sikur po hyja në një tunel. Kur erdha këtu, isha në gjendje jo të mirë, e ndjej përmirësimin”, thotë ajo mes lotësh.
Justina Aliaj ndodhet prej disa ditësh në spital. Ajo rezultoi pozitive me Covid-19 dhe u shtrua tek Infektivi, për shkak të gjendjes së rëndë.
