Ish-deputeti demokrat Ervin Salianji ka reaguar pas vendimit të Gjykatës së Shkallës së Parë, e cila e dënoi me 1 vit burg për dosjen “Babale”, pasi akuzohet për “kallëzim të rremë”.
Përmes një deklarate për mediat, Salianjit u shpreh se gjyqtari që dha këtë vendim i shërben Partisë Socialiste, ndërsa prokurorët i shërbejnë mafies. Ai theksoi se askush nuk e izolon dot dhe se ky gjyq e bën të jetë i privilegjuar.
Po ashtu, paralajmëroi që ditët në vijim do të publikohen shumë fakte, kurse nënvizoi se vendimi do të apelohet deri në Strasburg nëse është e nevojshme.
“Nuk ka mafie, llucë e llumë që më ndalin dhe më izolojnë dot. Kanë tërhequr një llucë të tillë dhe kontrollojnë prokurorë duke i shërbyer mafies. Më bën të privilegjuar që jam në 50 gjyqe me PS. Kam fakte që do t’i bëj publike në ditët në vijim. Parashikimi i kryeministrit ishte i saktë për të intimiduar opozitën, nuk ka asnjë diskutim se drejtësia e vjetër dhe llumi do të demontohen.
Së pari, është apeli, dhe ndjekja hap pas hapi në çdo instancë, ndërsa nëse vijohet me këtë situatë do të shkojmë në Strasburg. Gjyqtari, mik me Xhafajn. Kemi kohë për të folur edhe për skandale të tjera”, deklaroi Salianji.
