Një organizatë e fuqishme kriminale mafioze në Itali ka shtrirë aktivitetin e përfitimit të paligjshëm në bastet sportive online në 11 vende, e mes tyre edhe në Shqipëri.
Mëngjesin e sotëm Drejtoria e Antimafias e Antiterrorizmit italian ka kryer një mega operacion, duke shkatërruar organizatën e fuqishme me bazë në territorin e Puglias, Katanias e Calabrias.
Antimafia italiane ka ekzekutuar 68 urdhër arrestime, mbi 80 kontrolle e ka sekuestruar të mira materiale në vlerë 1 miliardë euro në 11 shtete: Shqipëria, Itali, Serbi, Austri, Spanjë, Maltë, Zvicër, Britani e Madhe, Vende të Ulëta, Kuracao, Isola di Man.
Ndër të arrestuarit janë disa sipërmarrës, që akuzohen për pjesëmarrje në organizim kriminal mafioz me aktivitet të paligjshëm në bastet sportive online, mashtrim në transferim parash, riciklim e autoriciklim të paligjshëm të ardhurash, si dhe mashtrim tatimor.
Vlera e basteve kapërcente 4,5 miliardë euro të luajtura në disa platforma online të menaxhuara nga kjo organizatë mafioze.
