Pas vendimit të Ministrisë së Shëndetësisë për vendosjen e detyrueshme të maskave në ambientet e mbyllura, pak ditë më parë u miratua akti normativ për ndalimin e muzikës pas orës 20:00.
Veç muzikës, në aktin normativ do të ndalojë “hapjen e klubeve të natës, diskove, lounge barve dhe çdo lloj shërbimi të kësaj natyre në mjedis të mbyllur apo të hapur, përveç restoranteve”.
Ministrja e Shëndetësisë, Ogerta Manastirliu, deklaroi se këto ambiente janë shndërruar në vendgrumbullime të rinjsh, ku injorohet zbatimi i masave.
Të hënën dhe të martën, përfaqësues të lokaleve të natës, artistë, por edhe të punësuar në këtë sektor protestuan para Kryeministrisë. Arben Ahmetaj, ministri i Shtetit për Rindërtimin dhe njëkohësisht edhe koordinator i planit për menaxhimin e pandemisë, foli sot për mbylljen e klubeve të natës, duke lënë të kuptohet se qeveria mund t’i ndihmojë.
Ahmetaj tha se siç qeveria iu gjet pranë qytetarëve për tërmetin, ashtu edhe për pandeminë, e njëjta mund të ndodhë edhe për artistët apo të punësuarit në lokalet e natës.
“Kemi pasur dy ngarkesa të mëdha. Një nga tërmeti, një nga pandemia dhe për çdo qytetar që procesi i rindërtimit ecën dhe për çdo qytetar që shikon që ka një akt normativ që mbyll baret e natës do reflektojë që në ditën e orës së vështirë. Kush është forca politike dhe lideri që përgjigjet dhe procesi i rindërtimit është një përgjigje shumë e drejtë dhe e verifikueshme se kjo qeveri dhe ky kryeministër nuk përgjigjet vetëm në ditë të mira por në ditë të vështira. Në atë momentin kur bie tërmeti dhe pandemia, te kush i kthejmë sytë? Besoj se kjo do na shoqërojë për një afat të gjatë, vështirësitë nuk kanë kaluar. Pandemia nuk ka mbaruar, ne na duhet qeveria dhe njeriu i orës së vështirë”, tha Ahmetaj.
