Përfundon procesi i votimit për zgjedhjen e delegatëve të Kongresit të Partisë Socialiste. Kreu i Grupit Parlamentar të PS-së, Taulant Balla deklaroi se në votime morën pjesë 76.068 anëtarë të kësaj force.
Përmes një deklarate për mediat, numri dy i socialistëve, e konsideroi procesin e sotëm një sukses.
Sipas tij, u testua për herë të parë votimi elektronik në Njësinë Nr.8 të Tiranës, por njëkohësisht solli një tjetër inkurajim, pasi 47% e kandidatëve për delegatë ishin gra dhe vajza.
“Dua të veçoj gjatë ditës së sotme, dy risitë që shënoi ky proces zgjedhor me testimin për herë të parë të votimit elektronik në Njësinë Nr.8 të Tiranës nga 989 anëtarë dhe 100 anëtarë të tjerë që votuan on-line.
Partia Socialiste tregoi se nuk është jo vetëm partia më e madhe dhe më e organizuar, por edhe partia më moderne në Shqipëri.
Barazia gjinore mori tjetër inkurajim në këtë proces, pasi 47% e kandidatëve për delegatë të Kongresit të PS ishin gra dhe vajza.
E dimë të gjithë se procesi i këtyre zgjedhjeve në parti, ka një rëndësi të veçantë për ecurinë e gjysmës së dytë të këtij mandati dhe për betejën për rinovimin e mandatit të socialistëve si shumicë qeverisëse në Qershor 2021”, nënvizoi Balla.
