Nga sot hyn në fuqi vendimi i qeverisë greke për të mos lejuar kalimin nëpërmjet Pikës Kufitare të Kapshticës. Drejtoria e Përgjithshme e Doganave, ka dalë me një njoftim zyrtar për mbylljen e pikës Doganore të Kapshticës, teksa sqaron se ky vendim nga shteti grek ka ardhur pas numrit të lartë të rasteve me koronavirus.
“Policia Kufitare e Kapshticës, iu bën thirrje të gjithë qytetarëve që duan të udhëtojnë drejt Greqisë, që gjatë këtij harku kohor, të shmangin udhëtimin në drejtim të kësaj pike kalimi”, thuhet në një njoftim.
Mësohet se përgjatë aksit rrugor Korçë-Kapshticë, do të ketë forca të policisë, të cilat do të mbikqyrin situatën dhe nuk do të lejojnë kalimin e mjeteve. Qeveria greke vendosi ditën e djeshme mbylljen e pikës kufitare me Kapshticën. Vendimi hyri në fuqi sot në orën 06:00 dhe pritet që të zgjasë deri më 4 Dhjetor.
E vetmja pikë kufitare e hapur me Greqinë është ajo e Kakavijës. Për të kaluar në shtetin grek, duhet testi negativ për koronavirus i kryer jo më shumë se 72 orë. Po kështu, personat duhet të dalin negativ në testin e shpejtë që zhvillohet nga autoritetet në doganë.
