Në një deklaratë për mediat, deputeti demokrat Edi Paloka ka lënë të kuptohet se në mbledhjen e Këshillit Kombëtar këtë të shtunë është përcaktuar aksioni politik. I pyetur nga mediat nëse kishte anëtarë të tjerë të Këshillit Kombëtar që kërkuan një datë për protesta dhe nisjen e aksionit opozitar, Paloka pohoi se diskutua dhe u morën dhe vendimet e duhura të cilat do bëhen të ditura më vonë.
“Kjo është një çështje që ishte në rend dite, u diskutua dhe u morën dhe vendimet e duhura që do i merrni vesh në kohën e përshtatshme”.
Këtë të shtunë gjithashtu është miratuar dhe rregullorja për mbajtjen e primareve brenda PD, e pas kësaj Berisha do të nisë negociatat me aleatët për mënyrën se si do të shkohet në zgjedhjet e ardhshme lokale.
Pas mbylljes të takimit, kryetari i Këshillit Kombëtar, Edi Paloka, ka zbuluar vendimet e marra për votimet për kandidatët në primare.
“U miratua rregullorja pengesë, pas kësaj do fillojnë kontaktet me aleatët me të cilët do bashkërendohet puna e gjithcka tjetër. Detajet si do veprohet në rast se do vendoset që aleatëve t’u lihet një zonë e lirë apo modalitetet. Sot mbyllëm rregulloren, të gjitha të tjerat nga nesër do përcaktohet dhe grupi negociator. Por Berisha do jetë negociatori kryesor“.
Ju folët për një grup negociator me aleatët, por po me pjesën tjetër të deputetëve demokratë që janë skeptikë si po drejtohet PD, do ketë negociata për të shkuar të bashkuar në zgjedhje?
“Deputetët e PD janë të PD kudo qofshin sot, janë zgjedhur nga anëtarësia e PD përfaqësojnë mazhorancën e atyre që i kanë votuar, janë të mirëpritur në cdo moment, janë të barabartë me ne, me pjesën tjetër nuk ka asnjë ndarje mes nesh”.
