Dy kompanitë “Salillari” dhe “Bajram N”, të bashkuara në këtë garë, u shpallën fituese në tenderin për ndërtimin e “Lotit 1” të projektit të “Unazës së Re” në Tiranë.
Këto dy firma ofruan shifrën 1.77 miliardë lekë, ndërsa fondi limit në këtë segment ishte 2.25 miliardë lekë.
Vendimi u dha nga Komisioni i Prokurimit Publik, i cili hodhi poshtë vendimin e Autoritetit Rrugor Shqiptar të dhënë në datën 8 gusht të këtij viti. Mirëpo, 15 ditë më vonë këto dy kompani kërkuan të zhvlerësohej vendimi i ARRSH-së. Në këtë garë morën pjesë plot 8 kompani.
Tenderi për “Lotin 1” u hap për herë të tretë më 14 qershor dhe u mbyll më 22 korrik. Në tenderin e dytë nuk u plotësuan kriteret nga asnjë kompani, ndërsa në të tretin u vendos që projekti të ndryshohej nga rreth-rrotullim me nënkalime dhe mbikalime, në kryqëzim me nënkalime.
