Inspektoriati Shtetëror Shëndetësor, ka mbyllur call-center-in ku u shënuan sot 15 raste të reja me koronavirus.
Në përditësimin e sotëm, Minstria e Shëndetësisë njoftoi se rastet në call-center ishin kontakte të një rasti pozitiv të identifikuar dy ditë më parë.
Pas fasonerive, call-center-at mbeten institucionet që janë më të ekspozuara ndaj përhapjes me COVID-19. Pjesa më dërrmuese e të infektuarve në Shqipëri janë pikërisht nga fasoneritë dhe call-center-at.
Mëngjesin e sotëm ka ndërruar jetë një pacient 69-vjeçar nga Tirana, me inicialet S.K., i cili po trajtohej në terapi intensive në Spitalin Infektiv.
Në 24 orët e fundit janë testuar 173 qytetarë si të dyshuar të prekur me Covid-19, dhe janë konfirmuar 25 raste pozitive. Më konkretisht janë 24 të prekur në Tiranë dhe 1 në Durrës. Ndër rastet e reja janë 15 të prekur në një call-center, kontakte të një rasti pozitiv të identifikuar dy ditë më parë. Po vijon hetimi epidemiologjik edhe për disa raste të reja në Tiranë.
