Situata duke mjaft kritike në Mbretërinë e Bashkuar, teksa në 24 orët e fundit janë shënuar 621 viktima nga koronavirusi.
COVID-19 ka shënuar tashmë në total 4,934 viktima, duke e renditur Mbretërinë e Bashkuar si vendin e pestë me numrin më të madh të viktimave.
Uellsi raportoi 12 vdekje të tjera të njerëzve që kishin testuar pozitivisht për Covid-19, duke e çuar numrin e vdekjeve në vend në 166.
Ndërsa në Skoci numri i viktimave ka shkuar në 220. Deri më tani në Mbretërinë e Bashkuar janë regjistruar mbi 47 mijë raste infektimi.
Italia mban ende vendin e parë për numrin më të madh të vdekjeve, me plot 15,362 viktima të shënuara, shifër kjo e cila nuk është përditësuar ende për ditën e sotme.
Më pas vjen Spanja me 12,418 viktima, ndërsa e treta renditet SHBA me 8,454 viktima. Ndërsa e katërta renditet Franca me 7,560 viktima, e cila mban edhe rekordin për numrin më të madh të viktimave të shënuar brenda 24 orëve. Më datë 2 prill në Francë u raportua se 1,355 njerëz humbën jetën nga koronavirusi brenda një dite të vetme.
Ndërkohë më shumë se 1 milionë e 200 mijë raste infektimi janë raportuar në të gjithë botën, ndërsa 66,502 njerëz kanë ndërruar jetë.
