Dje u shemb lokali i Mihal Kokëdhimës. Objekti në fjalë ishte ndërtuar në një territor prej rreth 2 mijë metrash katrorë, sipas IKMT-së pa leje, ndonëse familja Kokëdhima e shfrytëzonte kundrejt pagesës edhe vendin përpara objektit për plazh.
Gjatë aksionit, përpos forcave të IKMT-së, të pranishme kanë qenë edhe forca të policisë lokale dhe FNSH. Aksioni ka nisur prej orës 07:00 të mëngjesit, për të përfunduar rreth orës 13:00, orë në të cilën u larguan nga zona edhe inspektorët e IKMT-së.
Zona përreth objektit është rrethuar e gjitha përpara orës 07:00, ndërsa forcat e policisë kanë shkuar në mbështetje të IKMT, por edhe për të shmangur ndonjë konflikt të mundshëm që mund të krijohej në zonë.
Gjatë operacionit për shembjen e bar-restorant “Panorma” të Kokëdhimës, nuk është hasur në kundërshtimin e qytetarëve, apo familjarëve e të afërmve të Kokëdhimës. Përreth objektit nuk ishin të pranishëm asnjë nga personat e afërt apo familjarë të Kokëdhimës, të cilët kanë punuar prej vitesh në këtë objekt.
Mihal Kokëdhima ka qenë edhe më parë një emër problematik, sa i takon zbatimit të ligjit. Ai është arrestuar pas sulmit ndaj turistëve spanjollë, rast që më pas u bë publik edhe anë të videos që shpërndanë vetë të huajt.
Pas lajmit, rezultoi që restoranti nga ku u larguan të pakënaqur me shërbimin grupi i spanjollëve ishte pa leje, plot 2 mijë m/2 dhe dje IKMT nisi shembjen e tij. Kokëdhima ka patur edhe më parë probleme me ligjin, por i ka shpëtuar burgut.
