Situata me mbeturinat në Durrës ka bërë që Këshilli Bashkiak të shpallë ditën e sotme emergjencën mjedisore.
Koshat e mbeturinave në Durrës janë të tejmbushur dhe janë derdhur në rrugët e qytetit duke shkaktuar një katastrofë ekologjike si në aspektin e higjienës, por edhe në atë turistik pasi rrugët e qytetit që pritet të presë turistët tashmë duken si fushë grumbullimi plehrash.
Me shpalljen e gjendjes së emergjencës, Këshilli Bashkiak është dorëzuar duke pranuar se bashkia nuk ka më mundësi të përballojë situatën e plehrave.
“Miratimi i propozimit të shpalljes së emergjencës mjedisore në fushën e menaxhimit të integruar të mbetjeve në territorin e bashkisë Durrës për shkak të mbylljes së vend-depozitimit të Porto-Romanos”, shkruhet në vendimin e miratuar nga Këshilli Bashkiak.
Ky është hapi i parë që merret nga bashkia e qytetit për t’i hapur rrugë më pas marrëveshjes që mund të nënshkruhen me inceneratorët dhe të përcaktohet në mënyrë ligjore dhe institucionale se si do të trajtohen nga sot e tutje mbeturinat në qytetin e Durrësit.
Shkak i kësaj situate që po kthehet në problem për shëndetin e qytetarëve është bërë mbyllja e vend-depozitimit të mbeturinave në Porto Romano nga qeveria e cila ka vendosur që atje të ndërtojë një park ekologjik.
Mbeturinat u vendosën të dërgoheshin në Sharrë por kostoja ishte e papërballueshme dhe Bashkia Durrës vendosi t’i dërgonte në Manëz.
Kjo shkaktoi protesta të banorëve duke bllokuar kamionët me mbeturina pasi tymi dhe era e keqe po u merrte frymën dhe djegia e tyre ndodhet pranë banesave ku jetojnë.
Dërgimi i mbeturinave në Manëz zgjati vetëm 3 ditë. Ata u dogjën duke shkaktuar tym dhe erë të rëndë, ndërsa u groposën nga eskavatori.
Në një kohë krize ekonomike, ku industria e turizmit është në prag falimentimi, Bashkia e Durrësit pret një fond shtesë nga Ministria e Financave për të menaxhuar mbeturinat të cilat kanë mbetur rrugëve të qytetit pas një vendimi që mesa duket nga pasojat që solli ka qenë i pa studiuar, shkruan “opinion.al”.
