Përfaqësues të “Foltores” kanë tentuar të futen në selinë e Partisë Demokratike. Mësohet se në ambientet e selisë blu kanë shkuar demokratë nga njësia numër 8 në Tiranë, të cilët kanë kërkuar që të hapet gara për zgjedhje në PD. Ata kanë kërkuar që të zhvillojnë një mbledhje në kuadër të riorganizimit të partisë, por dyert e selisë kanë qenë të mbyllura.
Indrit Hoxha foli në emër të demokratëve të njësisë 8, duke deklaruar se kërkojnë largimin e Lulzim Bashës dhe dorëzimin e logos.
“Lulzim Basha është shkarkuar nga Kuvendi. Detyra e sotme e tij është që të largohet nga zyrat e selisë së PD-së. Të dorëzojë logon e konfiskuar që është marrë peng nga shumë njerëz, jo vetëm Edi Rama. Të hapë rrugën për zgjedhjet në PD sipas standardit një anëtar, një votë.
Blofet dhe fasadat që po luhen në selinë e PD-së, e dëmtojnë atë. Këta janë anëtarët e njësisë 8, që e kanë shkarkuar Lulzim Bashën dhe kërkojnë hapjen e garës dhe procesit për këdo që kërkon të ballafaqohet me votën e anëtarësisë,” tha Hoxha.
Sakaq, nga panairi i Ditës së Verës në Elbasan, ish-kryeministri Sali Berisha u ndal tek situata politike brenda Partisë Demokratike, duke thënë se ka një përpjekje për të stisur përballjen mes votës së lirë dhe blofit.
“Kjo do të jetë pranverë e përpjekjeve të mëdha të demokracisë për ngallnjimin e saj. Mesazhi më i shkëlqyer është bashkimi i demokratëve rreth votës së lirë dhe idealeve të saj. S’po mbroj asgjë tjetër përveç votës së lirë. Ka një përpjekje për të stisur një përballje mes votës së lirë dhe blofit, por atyre që e bëjnë këtë do t’u lëmë blofin në dorë”.
