Ditën e sotme, Bashkia e Kukësit ka paditur për shpërdorim detyre anëtarët e KZAZ nr.11, duke i akuzuar ata se vazhdojnë të mbajnë të bllokuara ambientet.
Kryebashkiaku i Kukësit, Bashkim Shehu deklaron se mjediset në Shkollën e Mesme “Havzi Nela” po mbahen të bllokuara në mënyrë të paligjshme. Në këtë mënyrë, ai shprehet se anëtarët e kësaj KZAZ-je po konsumojnë veprën penale të “Shpërdorimit të Detyrës”.
“Pavarësisht se anëtaret e KZAZ-së kanë marrë dijeni për shkak të detyrës, për anulimin e datës së zgjedhjeve vendore, ata vijojnë të mbajnë të bllokuar një objekt në pronësi të Bashkisë Kukës”, argumenton Shehu.
Në padinë dorëzuar Prokurorisë së Shkallës së Parë Kukës, arsyetohet se anëtarët e KZAZ-së Kukës kanë konsumuar veprën penale të shpërdorimit të detyrës në bashkëpunim, pasi kanë penguar Bashkinë Kukës në ushtrimin e detyrës së saj.
“Mos-dorëzimi i objektit në pronësi të Bashkisë Kukës nga ana e KZAZ-së, cenon veprimtarinë institucionale dhe marrëdhëniet juridike të vendosura me ligj”, shkruhet në padi.
Bashkia Kukës, duke vlerësuar se çdo veprim i ndërmarrë në kundërshtim me Dekretin e Presidentit gjykohet si shkelje e legjislacionit penal dhe kërkon procedimin penal të anëtarëve të KZAZ-së Kukës, për shpërdorim detyre, sipas nenit 248 të Kodit Penal.
