Ambasadori i Italisë në Shqipëri, Alberto Cuttillo, është i mendimit se mazhoranca duhet të bëjë një hap pas dhe të arrijë një dialog politik, pasi është përgjegjësia e tyre për atë që ndodh në vend. Cutillo, duke e drejtuar gishtin mbi mazhorancën për ngërçin politik, thotë se mungesa e dialogut nuk i shërben vendit dhe ekonomisë.
“Kriza politike mund të ndikojë në vendimin e Brukselit për negociatat, prandaj duhet që të ketë një reagim të menjëhershëm. Zgjatja e pasigurisë politike, nuk është në të mirë të vendit, dhe as të ekonomisë së tij.
Mazhoranca duhet të bëjë një hap pas, dhe të arrijë një dialog politik, pasi është përgjegjësia e tyre për atë që ndodh në vend. Që të nisësh dialogun me opozitën, nuk do të thotë që të plotësosh të gjitha kushtet e saj, po të diskutosh lidhur me problematikat që ajo ka ngritur, siç është blerja e votave apo korrupsioni, diskutim që do të ishte në interes të vendit”, u shpreh Cutillo.
Ambasadori shtoi se djegia e mandateve ishte një veprim që i surprizoi, dhe mund të ndikojë në vendimin e Brukselit.
Deputetët e opozitës vendosën djegien e mandateve dhe zhvillimin e protestave të vazhdueshme kundër qeverisë Rama. Protesta e rradhës e opozitës së bashkuar pritet të mbahet pasditen e 13 prillit.
