Ministri i Brendshëm italian, Matteo Salvini ka rënë sërish “pre” e kritikave. Këtë radhë, shkak është bërë djali i tij 16-vjeçar, Federico. Ky i fundit, po argëtohej me një motor uji i cili përdoret nga policia italiane, dhe ky veprim ka irrituar italianët.
Kjo skenë ka ndodhur në bregdetin e Milano Marittima, në Papeete Beach, aty ku Salvini po kalon pushimet verës. Në një moment, ai shkelmon topin në det dhe i pëshpërit një polici: “Unë po shkoj në çadër”. Pas kësaj policia merr motorin e ujit dhe shëtit Federicon.
Kjo pjesë u filmua nga një reporter, ndërsa dy punonjës të sigurisë pasi panë se po filmonte u përpoqën që t’i largojnë kamerën reporterit. Ndërkohë, dy policë u përpoqën të fshihnin ngjarjen duke dalë përpara kamerës, por nuk pati rezultat.
Ndërsa njëri prej policëve vuri re që gjithçka po filmohej, i bën thirrje policit tjetër që po ngiste motorin e ujit, që të kthehet në breg.
Në një prononcim për mediat, Salvini u shpreh se përgjegjësia bie mbi të. “Gabimi im si baba, asnjë përgjegjësi nuk duhet t’i jepet policëve, të cilët përkundrazi i falënderoj sepse çdo ditë rrezikojnë jetën e tyre për vendin tonë.”
Nga ana tjetër, partitë opozitare në vend, e përdorën këtë rast për të sulmuar ministrin e Brendshëm. “Policia ka për detyrë të garantojë sigurinë tonë dhe të mos argëtojë familjen e Salvinit”, tha Emmanuel Fiano nga Partia Demokratike e qendrës së majtë.
Në bazë të ligjit italian, ndalohet përdorimi i mjeteve shtetërore, aq më tepër ato të policisë për qëllime turistike.
