Dy vëllezërit Andi dhe Mario Roshi që kthyen qendrën e masazheve në vatër prostitucioni, kanë dalë ditën e sotme para gjykatës. Gjykata ka lënë në burg Marion, ndërsa për vëllanë e tij Andi Roshi ka vendosur masën ‘arrest shtëpie’.
Dy vëllezërit rekrutonin vajzat nëpërmjet rrjeteve sociale, me pretendimin për t’i punësuar si masazhatore, për të kryer masazhe relaksuese për klientët e këtyre qendrave. Pasi i rekrutonin dhe i punësonin, i detyronin punonjëset, që përveç masazhit t’u ofronin klientëve edhe shërbime seksuale.
Mario, 26 dhe Andi, 29 vjeç kishin kohë që ushtronin aktivitetin e licensuar në qendren e tyre të masazhit, që ndodhej në zonën e Pazarit të Ri.
Banesa, tip apartament e kthyer në çerdhe prostitucioni, ndodhej shumë pranë shtëpisë së ministrit të Brendshëm, Sandër Lleshaj.
Ata nisnin t’i njihnin vajzat përmes rrjeteve sociale, më pas dilnin me to dhe iu ofronin punë. Pas këtij momenti, vajzat nisnin punë si masazhatore. Por me kalimin e kohës, kur klientët besnikë të qendrës shfaqeshin, ato kryenin edhe “shërbime ekstra”, sipas kërkesës, kundrejt një shume të caktuar.
