Policia e Korçës ka arrestuar një 18-vjeçar pasi dyshohet si autor i vrasjes së 48-vjeçarit, Falmur Duçi; i cili u gjet i pajetë nga bashkëfshatarët pranë lokalit të tij në fshatin Mbroje të Korçës.
Sipas njoftimit të policisë, në pranga përfundoi shtetasi me iniciale D.H., i dënuar më parë për veprën penale “Plagosja e rëndë me dashje”.
Detaje nga ekzekutimi i korçarit. Tentuan ta digjnin, motra shpërthen në lot
Ndërkohë, vijojnë hetimet për sqarimin e mëtejshëm të ngjarjes së rëndë ndodhur mëngjesin e ditës së djeshme.
“Ndalohet 1 shtetas, i dyshuar si autor i vrasjes së 48-vjeçarit, ngjarje e ndodhur ditën e djeshme në fshatin Mborje.
Strukturat e Drejtorisë Vendore të Policisë Korçë në bashkëpunim me Prokurorinë pranë Gjykatës së Rrethit Gjyqësor Korçë, në vijim të punës për zbardhjen dhe dokumentimin e ngjarjes së ndodhur më datë 19.12.2019, ku në fshatin Mborje, pranë banesës dhe dyqanit të tij u gjet i vrarë shtetasi F.D., 48 vjeç, bënë të mundur kapjen dhe ndalimin e autorit të dyshuar të ngjarjes shtetasit:
D.H., 18 vjeç, banues në fshatin Mborje, i dënuar më parë për veprën penale “Plagosja e rëndë me dashje”.
Prokuroria e Rrethit Gjyqësor Korçë, bazuar në hetimet e kryera në lidhje me ngjarjen e mësipërme, ka urdhëruar ndalimin e këtij shtetasi pasi dyshohet se ka konsumuar elementë të veprës penale ‘Vrasja me dashje’”, thuhet ndër të tjera në reagimin e Policisë.
