Gazetari i njohur investigativ, Artan Hoxha deklaroi se përleshja me armë në Velipojë që shkaktoi bilanc tregjik me 4 viktima dhe 2 të plagosur, mund të ishte shmangur, nëse aplikimi për vendosjen e shezlongëve në sipërfaqet bredgetare, do të bëhej në pushtetin lokal, dhe jo si tani në portalin e-Albania.
Deklarata e Hoxhës u bë mbrëmjen e sotme në emisionin ”Log” në Abc News. Sipas tij, sipërfaqet për shfrytëzim duhet të jepeshin deri në fund të marsit, që në prill ose maj të ishin gati, por deri më sot nga e-Albania u ka shkuar asnjë njoftim bizneseve.
Hoxha u shpreh se nëse lejet për shfrytëzimin në bregdet do të kishte qenë në pushtetin lokal, kjo ngjarje e rëndë mund të ishte evituar.
Artan Hoxha: ”Deri para dy vitesh hapësira bregdetare e Shqipërisë është një sipërfaqe prej 325 km dhe janë gjithsej 118 plazhe nga jugu në veri që kanë qenë të administruara nga bashkitë. Këto mijëra biznese administroheshin nga pushteti vendor, me një vendim të çuditshëm, më thanë që është marrë përvoja e Malit të Zi, në Shqipëri u krijua një agjenci brenda Ministrisë së Turizmit dhe aplikimin që të gjitha bizneset e bënin pranë bashkive, tani duhet bërë te e-Albania.
Sipërfaqet duhet të jepeshin deri në fund të marsit, që në prill, maj të ishin gati, por jemi në fund të qershorit dhe nga e-Albania një pjesë të bizneseve nuk u ka shkuar asnjë njoftim. Bizneset janë përpjekur që të ruajnë të njëjtën hapësirë që kishin, e njëjta gjë ka ndodhur edhe në Velipojë, familja Gocaj ka kërkuar të ruajë hapësirën që kishte, por Ferracaku ka thënë kemi aplikuar ne.
Kur aplikonin në bashki paguanin taksën, vinte inspektori bënte piketimin dhe thoshte “vazhdoni punën” dhe problematikën e ndiqte policia bashkiake, tani duhet të aplikosh te e-Albania dhe njoftimi i dërgohet biznesit dhe pushtetit lokal, që i shkojnë taksat. Pushtetit vendor iu hoq me argumentin se ka korrupsion. Por në rastin konkret bashkia pasi njoftohet për lejet bën matjen për të përcaktuar sa shezlongë do të ketë. Nëse do të kishte qenë në pushtetin lokal kjo mund të ishte evituar”.