Detaje të reja të rënda janë hedhur në dritë sa i takon ekzekutimit të Albi Bashaliut mëngjesin e 27 dhjetorit në Peqin. Sipas “News24”, një prej të arrestuarve si bashkëpunëtorë të autorëve është Veiz Bashaliu, djali i xhaxhait të viktimës.
Në pranga gjithashtu ka rënë edhe 30-vjeçari Mikel Xhaja, i cili është banor i fshatit Gjoçaj, aty ku u vra dhe Albi Bashaliu.
Ata kanë ndihmuar autorët e krimit për të organizuar vrasjen dhe për t’u larguar nga vendngjarja, duke penguar dhe hetimet e policisë.
Atentati ka qenë i mirorganizuar, pasi autorët janë kujdesur të kryejnë porosinë, duke mos lënë gjurmë. Dy autorët e përfshirë në krim, kanë pasur dijeni për lëvizjet e 32-vjeçarit në zonë.
Veiz Bashaliu dhe Mikel Xhaja akuzohen se kanë penguar hetimet e policisë, e kanë fshehur detaje të krimit. Veiz Bashaliu, djali i xhaxhait të viktimës dhe është arrestuar pasi nuk ka dhënë shumë detaje për ngjarjen.
Ndërkohë personi tjetër i arrestuar, Mikel Xhaja, në një përgjim ambiental ka folur duke theksuar, ”çfarë na duhet ne, më mirë themi s’kemi parë e as kemi dëgjuar gjë”.
