Akoma nuk është shuar jehona e zgjedhjes së Gramoz Ruçit në krye të Kuvendit të Shqipërisë. Është përfolur shumë për të shkuarën e tij në periudhën kur ishte ministër i Brendshëm. Thuajse e gjithë Partia Socialiste ka dalë në mbrojtje të Ruçit kur ai u votua në krye të kuvendit. Mbrojtësi më i madh e tij është vetë kryeministri Edi Rama. Që në ditën që u propozua për kryetar kuvendi dhe deri më sot Rama nuk resht së mbrojturi publikisht Ruçin. Në një intervistë të gjatë për gazetën austriake Der Standard, ku Rama është pyetur se a po bëhen hetime brenda partisë tuaj socialiste për kohën kur kryetari i ri i Parlamentit Gramoz Ruçi, ishte Ministër i Brendshëm në vitin 1991, kur 4 vetë u vranë në demonstratë në Shkodër? Rama i është përgjigjur se kjo është hetuar dhe gjykuar në gjykatë dhe është liruar nga të gjithë akuzat e çmendura. Pse duhet që partia të hetojë tani për këtë. Unë jam për një kohë të gjatë lider i kësaj partie. Unë kam qenë edhe lider i lëvizjes antikomuniste. Kjo Parti Socialiste që unë drejtoj nuk ka asnjë lidhje me të kaluarën … Ai ka vepruar në mënyrë të shkëlqyer, sepse ai organizoi zgjedhjet e para të lira dhe të drejta si ministër i Brendshëm dhe në këto zgjedhje, presidenti komunist humbi zgjedhjet. Pjesa tjetër janë thjesht broçkulla dhe nuk e kuptoj sesi mund të diskutohet në 2017, kur ne kemi miratuar ligjin që lejon publikimin e të gjithë dosjeve nga koha e komunizmit, kemi punuar për rreth 1 vit me Gjermaninë për këtë propozim.
Përse akuzohet Gramoz Ruçi
Gramoz Ruçi u emërua Sekretar i parë Partisë së Punës i rrethit të Tepelenës në vitin 1988, dhe në vitin 1990 ai u emërua Ministër i Brendshëm. Nga viti 1992 deri në vitin 1996 ai ishte Sekretar i Përgjithshëm i PS.
Ruçi është akuzuar nga ish-të përndjekurit si i implikuar në krimet e regjimit komunist, madje akuzat vijojnë me tej ku thuhet se prej vitit 2005 i është ndaluar të hyjë në Shtetet e Bashkuara të Amerikës.
Ajo që e rendon dhe i përforcon më shumë akuzat për zotin Ruçi është ngjarja e 2 prillit ’91 në Shkodër. Me urdhër të brendshëm për forcat e policisë dhe të Sigurimit në lidhje me trazirat në Shkodër fill pas zgjedhjeve të 31 marsit 1991. Sipas këtij urdhri jepet liri për të përdorur armë përgjatë protestave nga ana e policisë. Dokumenti është firmosur nga Gramoz Ruci, atëherë ministër i Brendshëm.
“Shtëpia e Gjetheve”, ka risjellë në kujtesën e shqiptarëve shtëpinë nga e cila përgjoheshin dhe ku përdoreshin tortura speciale kundër kundërshtarëve politik në kohën e diktaturës. Një nga objektet e ekspozuara është edhe një foto që pasqyron hierarkinë e ministrave të Brendshëm, që drejtonin këtë shtëpi torturash.
“Piramida e varësisë partiake dhe administrative”, shkruhet në këtë fotografi në majë të së cilës qëndron Enver Hoxha dhe më poshtë emra famëkeq si Mehmet Shehu, Feçor Shehu, Aredin Shyti, Hekuran Isai, Simon Stefani, Ramiz Alia dhe Gramoz Ruçi, kryeparlamentari i ri i zgjedhur nga Rama.
Ndërkohë që karriera e tij në periudhën e demokracisë është ngjitur në Partinë Socialiste, ku bie në sy potenca dhe autoriteti në vendimmarrje.
Pyetjet për Gramoz Ruçin në Intervistë
Kryetari i ri i Parlamentit Gramoz Ruçi, ishte Ministër i Brendshëm në vitin 1991, kur 4 vetë u vranë në demonstratë në Shkodër. A po bëhen hetime brenda partisë tuaj socialiste për atë kohë?
Kjo është hetuar dhe gjykuar në gjykatë dhe është liruar nga të gjithë akuzat e çmendura. Pse duhet që partia të hetojë tani për këtë. Unë jam për një kohë të gjatë lider i kësaj partie. Unë kam qenë edhe lider i lëvizjes antikomuniste. Kjo Parti Socialiste që unë drejtoj nuk ka asnjë lidhje me të kaluarën …
… megjithëse ai ka qenë ish-ministër i Brendshëm
…i cili ishte ministër i Brendshëm në periudhën e tranzicionit, saktësisht pas revoltës. Ai ka vepruar në mënyrë të shkëlqyer, sepse ai organizoi zgjedhjet e para të lira dhe të drejta si ministër i Brendshëm dhe në këto zgjedhje, presidenti komunist humbi zgjedhjet. Pjesa tjetër janë thjesht broçkulla dhe nuk e kuptoj sesi mund të diskutohet në 2017, kur ne kemi miratuar ligjin që lejon publikimin e të gjithë dosjeve nga koha e komunizmit, kemi punuar për rreth 1 vit me Gjermaninë për këtë propozim. Ne kemi hapur “Shtëpinë e gjetheve” dhe muzeun e bunkerit të komunizmit, në mënyrë që njerëzit të trajtojnë të kaluarën dhe ne i kemi paguar kompensim të gjithë ish të përndjekurve politikë që janë gjallë. Dhe tani ju më thoni mua ish ministër i Brendshëm?
Po, sepse ai është simboli i asaj kohe. A ka diskutime në partinë tuaj për këtë?
Jo, sepse partia është shkëputur prej tyre kohë më parë dhe ai nuk është simbol i asnjë gjëje. Ai është vetëm objektivi i një opozite barbare, e cila kërkon vetëm të demonizojë njerëzit. Një numë r i madh shqiptarësh e respektojnë atë shumë, sepse ai ka treguar integritet dhe ka reformuar partinë dhe unë jam i kënaqur që parlamenti tani punon si një parlament dhe jo si një klub të dehurish – pak muaj më parë.
