Një ditë më parë, Policia e Shtetit deklaroi se ka informacione për nxitje të dhunës dhe organizime me natyrë kriminale, ku synohet hyrja me forcë në sallën e Parlamentit. Sikundër duket qartë edhe nga pamjet në fjalë, sot janë marrë masat shtesë, për të shmangur ndonjë incident të mundshëm.
Tashmë është formuar kordoni i policisë përgjatë Parlamentit. Po kështu është bllokuar pedonalia për këmbësorët dhe qarkullimi në rrugën “Xhorxh Bush”. 1200 forca policie do të jenë në terren, për të ruajtur rendin dhe qetësinë.
Forcat e Ndërhyrjes së Shpejtë do të jenë në oborrin e Parlamentit. Garda do të qëndrojë brenda Parlamentit dhe në tarracë. Ndërkohë, përreth Parlamentit janë vendosur tela me gjemba.
