Deputetja socialiste, Blerina Gjylameti, e ftuar në studion e lajmeve në RTV Ora, tha se nuk ka një marrëveshje mes PS dhe PD, por ka vetëm ftesë për dialog.
Në këtë formë ajo ka vënë pikat mbi “i”, duke shuar të gjithë zërat për një marrëveshje të mundshme mes PS dhe PD. Gjylameti i mëshoi fort faktit se nuk ka asnjë marrëveshje mes dy forcave kryesore, dhe se e vetmja dakordësi publike mbetet ftesa e hapur nga ana e PS-së për dialog.
A ka një marrëveshje mes PS dhe PD, pasi opozita e re i druhet një marrëveshje të tillë?
Jo, ka një ftesë për dialog, një ftesë e përsëritur herë pas here, rregullisht. Ka qenë opozita jo parlamentare që në takimet që ka patur me grupin e CDU – CSU, e kanë vendosur në kushtet për hapjen e negociatave, reformën zgjedhore.
Ftesa vazhdon ende. Ai momenti i djeshëm tregoi që dialogu ka filluar, ta çojmë më tutje me veprime konkrete në mënyrë që ta votojmë sëbashku me kolegët tanë të opozitës në parlament këtë reformë që është e shumëpritur.
Pra e shihni si një hap të parë të zgjidhjes së krizës politike, tryezën për reformën zgjedhore?
Unë mendoj që po, pavarësisht faktit se ishte në nivel ekspertësh nga PD, pavarësisht se mbajtën një deklaratë politike dhe e lanë me aq, por nuk erdhën me propozime konkrete për të zgjidhur ngërçin dhe për të adresuar problematikat që kanë të bëjmë me administrimin e procesit zgjedhor. Hapi i parë është pozitiv. Nëse besoj se ftesës sonë të vazhdueshëm do ti përgjigjen dhe po ashtu edhe nga partnerët ndërkombëtarët, që janë pjesë e pandarë e këtij procesi. Nëse ngelemi në fazën e retorikës, dhe nuk ulemi në tavolinë për të adresuar problemet që kanë të bëjnë me procesin zgjedhor, në fund të ditës nuk kemi arritur asgjë.
