Kosova dhe Serbia kanë arritur dakortësinë, për çështjen e targave në Bruksel. Zëvendëskryeministri i Kosovës, Besnik Bislimi, ka konfirmuar se është arritur një draft final, dhe pritet që të miratohet edhe nga pala serbe para se marrëveshja të quhet si e finalizuar.
Sipas Bislimit, janë tre pika të marrëveshjes e po pritet vetëm miratimi nga pala serbe.
E para, nga dita e hënë si Kosova ashtu edhe Serbia të avancojnë në përdorimin e stikersave në vend të ndërrimit të tabelave;
E dyta, do të formohet grup punues për gjetje të një zgjedhje të përhershme, për lëvizje të lirë të veturave brenda gjashtë muajve;
E tretë, ka të bëjë me deeskalimin e situatës, largimin e barrikadave nga dy pikat kufitare në Jarinjë e Bërnjak.
Në 24 orët e fundit nuk është raportuar për ndonjë incident në afërsi të pikave kufitare, Jarinjë e Bërnjak.
Njësitë speciale të Policisë së Kosovës vijojnë të qëndrojnë pranë bllokadave, ndërkohë që misioni i KFOR-it ka rritur prezencën në këtë pjesë.
