BE-ja dhe Kina, janë të gatshme të mbrojnë Marrëveshjen e Parisit për luftën kundër ngrohjes klimatike, në një kohë kur Donald Trump po mban pezull përgjigjen për një tërheqje të mundshme të SHBA-ve.
Në epokën Obama, Uashingtoni dhe Pekini ishin shtyllat mbështetëse të marrëveshjes së dhjetorit 2015, në të cilën 196 vende nën drejtimin e OKB-së janë angazhuar të limitojnë rritjen e temperaturave dhe të reduktojnë prodhimin e gazrave me efekt serrë.
Nesër në Bruksel, Kina do të jetë në krah të BE-së për një deklaratë të përbashkët përballë zvarritjeve amerikane për të konfirmuar angazhimin e tyre përballë Marrëveshjes historike të Parisit dhe të përshpejtojnë bashkëpunimin e tyre për të përmirësuar aplikimin e saj, sipas një projekt-deklarate.
BE-ja dhe Kina janë të vendosura të përparojnë mbi politika dhe masa të nevojshme për aplikimin konkret të angazhimeve të marra në kuadër të Marrëveshjes së Parisit, theksohet në këtë dokument.
Media amerikane ka njoftuar sot se Donald Trump ka vendosur të tërhiqet nga marrëveshja e Parisit, por ky i fundit në një mesazh në “Tëitter”, ka premtuar se do të bëjë të ditur shpejt vendimin.
Tërheqja e SHBA-së, një prej ndotësve më të mëdhenj në botë, do të jetë goditje e fortë kundër ndryshimit klimatik, vetëm një vit e gjysmë pas euforisë së krijuar nga marrëveshja e Parisit.
