Partia Demokratike pritet të zyrtarizojë ditën e sotme emrat e ministrave teknikë. Emrat që do të plotësojnë kabinetin qeveritar teknik pas ndryshimeve në bazë të marrëveshjes Rama-Basha, kanë kaluar përmes një analize të detajuar të selisë blu.
Për këtë arsye, burimet nga Partia Demokratike theksojnë për “Tirana Today” se lista ka qenë tepër sekrete dhe çdo hamendësim që është bërë në media për emra të mundshëm që mund të marrin këto poste ministrore qëndrojnë jashtë asaj çfarë ka vendosur të përzgjedhë Partia Demokratike.
“PD hedh poshtë të gjitha përsiatjet në media, për emrat e ministrave teknikë, dhe për emrat e kandidatëve për deputetë. Ministrat teknikë që do propozohen nga PD sipas marrëveshjes së 18 majit, do të jenë gardianë të zbatimit të marrëveshjes në funksion të garantimit të votës së lirë, përmes luftës ndaj drogës, parave të drogës, krimit, dhe moslejimin e shfrytëzimit të administratës për interesa elektorale. Nga baza demokrate janë propozuar mbi 1700 kandidatura për deputet përmes një procesi të hapur edhe për qytetarët”, thuhej një ditë më parë në njoftimin e shpërndarë nga zyra e shtypit e Partisë Demokratike.
Pas miratimit të listës së ministrave teknikë, kreu i Partisë Demokratike do t’ia dorëzojë atë kryeministrit Edi Rama për t’i dhënë edhe ai pëlqimin e tij.
Lista e ministrave teknikë do të kalojë pasditen e së hënës në Kuvend për t’u miratuar së bashku me Vettingun dhe ndryshimet në Kodin Zgjedhor.
Ministrat teknikë do të drejtojnë vendin përmes një qasje apolitike përgjatë fushatës elektorale, ditën e zgjedhjeve dhe deri në formimin e qeverisë së re. Kjo ka si synim garantimin e një procesi zgjedhor sa më të ndershëm dhe për të shmangur akuzat postzgjedhore lidhur me manipulimin e zgjedhjeve.
