Kryeprokurorja e Përkohshme, Arta Marku i ka dhënë ultimatum të gjithë prokurorëve duke u thënë së është shansi i tyre i fundit, ndryshe vettingu do t’ju presë kokën. Marku tha se prokurorët procesin e rivlerësimit nuk duhet ta shohin si ndëshkim, por si mundësi për dinjitet dhe reputacion për vete dhe institucionin.
Kryeprokurorja theksoi se vettingu është i domosdoshëm për të përmirësuar problematikat e të shkuarës në institucionin e akuzës në mënyrë që të vazhdohet me forcë përpara në shërbim të interesave madhore të përbashkëta të vendit.
“Trupa e prokurorëve ndodhet përpara procesit historik të rivlerësimit për vetë prokurorët dhe tërë sistemin e drejtësisë. Mbështetje të vendosur për çdo prokuror për të vazhduar me përkushtim ushtrimin e funksioneve, që procesin e rivlerësimit ta shohin jo si ndëshkim, por si mundësi për dinjitet, reputacion për vete dhe institucionin. Ky proces është i domosdoshëm për të përmirësuar problematikat e të shkuarës dhe për të vazhduar me forcë përpara në shërbim të interesave madhore të përbashkëta,” tha Marku.
Kryeprokurorja çmoi me bindje mundësimin e përparimit të vazhdueshëm të prokurorisë në garantim të zbatimit të ligjit dhe përmbushjen e misionit të saj kushtetues.
