Kryeprokurorja e Përgjithshme e përkohshme, Arta Marku është treguar mjaft kritike ndaj punës së prokurorëve. E pranishme në analizën vjetore të Prokurorisë së Tiranës, Marku tha se prokurorët nuk kanë treguar përqendrimin e nevojshëm dhe se shumë dosje janë zvarritur pa asnjë justifikim.
Më tej, Marku ftoi prokurorët që të mos merren me deklarata politike, por të vazhdojnë punën e tyre.
“Ngarkesa duket se ka ulur cilësinë dhe efektivitetin në punë. Nuk jeni përqendruar sa duhet. Çështje mjaft të rëndësishme janë zvarritur pa justifikim, rrinë në sirtar prej vitesh me një mungesë të theksuar përgjegjësie. Për pastrim parash janë regjistruar shumë pak çështje. Kjo situatë nuk i përgjigjet realitetit dhe Shqipëria mund të penalizohet. Hetimet janë të pakta. Përgjegjësia është e secilit prej jush dhe në një moment secili do të mbajë përgjegjësinë që i takon. Vijoni që të punoni dhe kryeni veprimet hetimore. Nëse veprohet shpejt nuk u lihet hapësirë spekulimeve. Bëni kujdes me deklaratat publike, pasi rrezikoni funksionin primar, atë të hetimeve. Prokuroria nuk mund t’u përgjigjet politikës çdo herë me deklarata,” ka thënë Kryeprokurorja.
