Pas suksesit të këtij viti, Maratona e Tiranës do të jetë pjesë e kalendarit të Federatës Evropiane. Lajmi është bërë i ditur nga kryetari i Bashkisë së Tiranës, Erion Veliaj. Ai e ka quajtur një super lajm dhe mundësi për të përcjellë zërin e kryeqytetit në gjithë botën.
Sipas informacioneve, kjo përfshirje në kalendar vjen pas zhvillimit me sukses të katër edicioneve të mëparshme të gjysmëmaratonës. Me rastin e 100 vjetorit të kryeqytetit, Tirana do të jetë gati për garën e 42 km, 21 km dhe 10 km, me pjesëmarrje botërore.
Postimi i Veliaj:
“Super lajm! Tirana Marathon për 100-vjetorin e kryeqytetit do të jetë në 18 Tetor 2020! Për herë të parë Federata Europiane e Atletikës na regjistron me garë të plotë 42 km si dhe të tjerat 21 dhe 10! Forca, forca, forca!”, shkruan Veliaj në “wëitter”.
Do të jenë 42 km më promovuese për Tiranën e jo vetëm, duke krijuar një mundësi të shkëlqyer për të përcjellë zërin e kryeqytetit, përtej kufijve në të gjithë botën. Itineraret e certifikuar nga Federata Ndërkombëtare e Atletikës – IAAF, përshkruajnë pikat më atraktive të qytetit duke e kthyer këtë garë jo vetëm në sfidë por edhe në argëtim. Përveç se një ngjarje sportive për garuesit, Maratona konsiderohet edhe një ditë festive për qytetin, në të cilin organizohen shumë aktivitete artistiko-kulturore në kuadër të këtij eventi.
