Për shkak të rasteve të shtuara me COVID-19, është marrë vendimi që të pezullohet përfundimisht kampionati i futbollit në Maqedoninë e Veriut. Federata e Futbollit të Maqedonisë së Veriut, ka ndërprerë zyrtarisht sezonin 2019-2020 në elitën e futbollit vendor.
Pas një mbledhje të jashtëzakonshme të zhvilluar nga Këshilli Drejtues i FFM-së, të cilët kanë marrë rekomandimin nga Komisioni i Garave për ndërprerje të sezonit 2019/20 në Ligën e Parë dhe Kupën e Maqedonisë, është marrë edhe vendimi final.
Zgjidhja më e mirë për momentin ka qenë pezullimi i futbollit, pas rasteve të konfirmuara së fundmi te dy skuadrat shqiptare, të Shkëndijës së Tetovës dhe Renovës.
“Duke ndjekur gjendjen shëndetësore në vendin tonë, veçanërisht në ditët e fundit dhe situatën me testet pozitive me Covid 19 të konfirmuara te disa futbollist te Renova dhe Shkëndija dhe më pas procesi i vetë-izolimit, Këshilli Drejtues solli vendim ta ndërpretë sezonin garues 2019/20 në Ligën e Parë”, thuhet në komunikatën e FFM-së.
