Interi shkatërron Chievon me rezultatin 5-0 në “San Siro” dhe merr kreun e Serie A, pasi Napoli u mposht nga Juventus në ndeshjen e fundit. Ishte një ndeshje ku fitorja ishte detyrim dhe djemtë e Spalletit e arrijnë me mjaft meritë. Ivan Perisic është lojtari i ndeshjes pasi shënon tre gola në këtë sfidë dhe është hat-trick i parë që nga momenti që i është bashkuar Interit. Icardi dhe Skrinar kanë qenë autorët e golave të tjerë për të plotësuar këtë 0-5. Kjo është hera e dytë që Inter merr drejtimin e Serie A këtë sezon, por herën e parë vetëm 24 orë qëndroi pasi u rimor sërish nga Napoli.
Përballja me Chievon nuk ishte menduar të ishte kaq e lehtë për zikaltërit, por ata treguan edhe njëherë se janë në një nivel tjetër këtë sezon dhe shifrat i kanë vendosur me meritë, pasi në 15 javë nuk kanë regjistruar asnjë humbje. Pjesa e parë foli vetëm për Interin që nga starti edhe pse u zhbllokua në minutën e 23’ nga kroati, Perisic, i cili godet shumë fort topin pas tentativës së parë të bërë nga Santon dhe mposht Sorrentinon.
Icardi mendon të shënojë golin e dytë dhe të sjellë sigurinë që në pjesën e parë. Është Brozovic që nxjerr një asist perfekt për argjentinasin, i cili godet sapo futet në zonë dhe gjen rrjetën. Me këtë gol Icardi merr edhe kryesimin e listës së golashënuesve me 16 gola në 15 javë kampionat, një më shumë se Immobile.
Pjesa e dytë nis sërish me ritme shumë të larta dhe me një Inter që nuk është i interesuar për të mbrojtur rezultatin. Është Perisic që shënon në minutën e 57’, pasi përfiton mjaft mirë nga një gabim i lojtarëve të Chievos.
Tre minuta më vonë do të vijë edhe goli i katërt për zikaltërit, këtë herë është Milan Slrinar i cili ndjek mjaft mirë kundërsulmin dhe bën një goditje perfekte me kokë pas krosimit të Candrevas.
Në pjesën e mbetur të lojës Spalleti vendos të largojë nga loja Icardin, Candrevan dhe Dambrosion, pasi javën e ardhshme Interi do të ketë një përballje mjaft të vështirë, atë me Juventusin. Në vend të tyre u inkuadruan dy lojtarët e rinj, braziliani Dalbert dhe francezi Karamoh. Një paraqitje për tu vlerësuar për mbrojtësin anësorë brazilian, i cili bëri disa kombinime mjaft të bukura me Perisic. Nga ana tjetër Karamoh ishte shumë pranë gjetjes së golit të parë me fanellën e Interit, por gjuajtja kaloi ngjitur me shtyllën. Në kohën shtesë shënon sërish ylli kroat, Perisic, për të vulosur rezultatin përfundimtarë, por edhe për të plotësuar tregolëshin e tij personal.
