Deputeti Lefter Maliqi ka kërkuar interpelancë me Ministrin e Brendshëm Sandër Lleshaj, për situatën e kriminalitetit në vend.
Përmes një postimi në Facebook, Maliqi shkruan se priste dorëheqjen e Lleshajt sot në Elbasan, por kur dëgjoi se nuk do ta kryente diçka të tillë, depozitoi menjëherë interpelancën në Kuvend.
Sipas tij, Lleshaj e ka mendjen të bredhë me BMW-të 150 mijë euroshe, kur në fakt duhet të japë llogari për vrajset e atentatet që po ndodhin çdo ditë.
Maliqi beson se më 25 prill, kjo qeveri do shporret nga shqiptarët.
Postimi i Maliqit në Facebook
Në pritje të interpelancës urgjente me Ministrin e Brendshëm Sandër Lleshaj… Isha duke pritur largimin e Ministrit të Brendshëm, meqënëse e deklaroi vetë nga Vlora, por kur e ktheu prapë në Elbasan, se do të jetë në qeveri edhe për ca muaj të tjerë, (merret me mend ky ndryshim vendimi), depozitova sot në Kuvend kërkesën urgjente për interpelancë me Sandër Lleshajn.
Ministri që e ka mendjen të bredhë më BMW-në 150 mijë euroshe, duhet të japë llogari për situatën e kriminalitetit në vend, me vrasje, atentate e aksidente çdo ditë, ngjarjet e rënda të pazbardhura, si po kryhet vetingu në polici, kultivimi i kanabisit nëpër qarqe etj.
Megjithëse Ministri ynë me ‘një këmbë në varr’, e ka pranuar vetë dështimin këto ditë, kjo punë nuk kalon kaq thjesht.
Në media, Ministri ka për detyrë ti përgjigjet pyetjeve, por në Kuvend, ka për detyrë të japë llogari.
Jam në pritje të ballafaqimit në tempullin e Demokracisë me njeriun që i ka mbetur sahati në kohën e ‘xhaxhit’.
