Pasditen e sotme, një aksident i rëndë ka ndodhur në aksin rrugor Koplik-Dedaj, në vendin e quajtur “Ura e Zhajës”, fshati Zagorë. Për pasojë, ka humbur jetën një shtetase dhe është plagosur bashkëshorti i saj 65 vjeçar. Çifti Gjergj e Gjystina Durgaj, kanë qenë duke udhëtuar në mjetin tip Benz, kur drejtuesi i saj ka humbur kontrollin.
Për pasojë, automjeti sipas verifikimeve në terren të grupit hetimor, ka kryer disa rrokullisje. Goditjet e marra kanë qenë fatale për bashkëshorten pasagjere, e cila ka dalë nga automjeti gjatë rrokullisjes.
Ndërsa 65-vjeçari ka marrë disa plagë në trup dhe është dërguar me urgjencë në spitalin rajonal të Shkodrës. Ai ndodhet jashtë rreziku për jetën, megjithëse plagët e marra janë të shumta. Të paqarta mbeten shkaqet që kanë sjellë rrëshqitjen e mjetit. Dyshohet që ndikim të ketë patur lagështira, si pasojë e reshjeve që kanë shoqëruar qarkun Shkodër këto ditë.
