Ministri i Shtetit për Diasporën, Pandeli Majko tha se për çështjet e emigracionit do të bashkëpunohet me shtetet fqinje.
Sipas Majkos, kombi ynë u nda nga traktatet, por kjo nuk parashikon ndarjen e shqiptarëve në Diasporë.
Ministri vlerësoi lidhjet e mira me emigracionin në Luginën e Preshevës, Maqedoni dhe në Mal të Zi, të cilat tha se duhen marrë si bazë për një bashkëpunimin e mëtejshëm.
“Në Luginë, Maqedoni dhe Mal të Zi ka lidhje të mira me emigracionin dhe eksperiencat më pozitive vlen të shikohen si bazë për një bashkëpunim në këtë drejtim”, tha ndër të tjera Majko.
FJALA E MAJKOS:
Me kalimin e kohës, emigracioni shqiptar ka filluar të vetorganizohet, duke u lidhur me atë të vjetrin. Ai po ashtu bashkëpunon natyrshëm e vëllazërisht me emigracionin shqiptar dhe Diasporën e shtetit të Kosovës, Maqedonisë, Malit të Zi dhe Luginës. Për çështjet e emigracionit dhe Diasporës do të bashkëpunohet sidomos me shtetet fqinje. Do të ishte ironike që organizimi i shqiptarëve në Diasporë, të ndahej me kufijtë e shteteve ku ata jetojnë dhe nga vijnë. Traktatet ndërkombëtare e kanë ndarë kombin në kufi, por ato nuk parashikojnë ndonjë kapitull për ndarjen e shqiptarëve në Diasporë. Do të jetë një detyrë e dorës së parë bashkëpunimi me Kosovën për këtë çështje dhe pastaj të dyja shtetet së bashku të ndajmë eksperiencat më të mira dhe detyrat që na takojnë përballë bashkëkombasve tanë në emigracion. Në Maqedoni, Mal të Zi dhe Luginë ka lidhje të mira me emigracionin dhe eksperiencat më pozitive vlen të shikohen me respekt dhe bazë për një bashkëpunim në këtë drejtim. Në programin e qeverisë, çështja e administratës që do të mbulojë emigracionin dhe Diasporën, do të organizohet në formën e një agjencie shtetërore.
