Mbrëmjen e djeshme, presidenti Macron priti në samitin e Korsikës gjashtë vendet e BE-së, përfshirë këtu edhe Greqinë.
Pas bisedimeve me udhëheqësit e Italisë, Maltës, Portugalisë, Spanjës, Greqisë dhe Qipros, Macron tha se udhëheqësit donin të ribashkoheshin në një dialog me Turqinë “me mirëbesim”.
“Na vjen keq që Turqia nuk u është përgjigjur thirrjeve të përsëritura nga Bashkimi Evropian për t’i dhënë fund veprimtarive të saj të njëanshme dhe të paligjshme në Mesdheun Lindor dhe Detin Egje. Ne evropianët duhet të jemi të qartë dhe të vendosur me qeverinë e presidentit Erdogan, e cila sot po sillet në një mënyrë të papranueshme”, tha Macron për gazetarët para fillimit të samitit.
Sipas tij, për shkak të sjelljes së saj në Mesdheun lindor, Turqia nuk ishte “më një partner në rajon”. Presidenti francez theksoi se Turqia kishte “intensifikuar provokimet në një mënyrë që nuk është e denjë për një shtet të madh. Populli turk është një popull i madh dhe meriton diçka tjetër”.
