Presidenti francez, Emmanuel Macron duket se është i gatshëm të njoftojë zgjatjen e masave të izolimit për shkak të përhapjes së koronavirusit.
Sipas mediave të huaja, masat e izolimit mund të zgjaten të paktën deri në 10 maj. Sipas burimeve pranë presidentit lajmi do të njoftohet mbrëmjen e sotme nga vetë Macron.
Ky do jetë fjalimi i tretë solemn për kombin francez që nga shpërthimi i pandemisë së koronavirusit. Gjithashtu ai pritet të tregojë edhe sesi do të startojë ekonomia pas mesit të muajit maj.
Franca është vendi i katërt më i prekur nga COVID-19 në botë, pas Italisë, Spanjës dhe SHBA-ve. Deri më tani Franca regjistron 132,591 raste infektimi, ndërsa numri i viktimave ka shkuar në 14,393.
Ditët e fundit kurba ka shënuar një rënie në Francë, duke shënuar më pak viktima se javën e kaluar ku bilanci ditor e kalonte shifrën 1,000.
Mbi 27 mijë vetë janë shëruar nga COVID-19 në Francë, teksa mbi 91 mijë raste janë ende aktive. Ndërkohë 6,845 persona ndodhen në gjendje kritike për jetën.
Në të gjithë botën numërohen më shumë se 1,8 milionë raste me koronavirus, ndërsa mbi 115 mijë persona kanë ndërruar jetë.
