Lëvizja Vetëvendosje me qendër në Shqipëri, vijon të nxjerrë fakte që sipas kësaj force politike, tregojnë se si u manipuluan zgjedhjet parlamentare të 25 prillit.
Vetëvendosje publikoi një video në rrjetet sociale, ku shihet se në një KZAZ, një prej numëruesve ka patur një laps në dorë, duke i bërë votat të pavlefshme.
LVV shprehet se pamjet janë nxjerrë nga videoxhirimet zyrtare të KQZ-së, dhe për këtë rast ankesa është depozituar mbrëmë në KQZ/KAS.
Sipas kësaj partie, zgjedhjet e 25 prillit janë të pavlefshme, ndaj dhe për këtë arsye ato duhet të përsëriten.
Postimi i Vetëvendosjes në rrjetin social, Facebook
Lapsi i vogël i vjedhjes së madhe të votave
Duke fshehur edhe dorën edhe lapsin, çfarë shenjash po vendos ky anëtar i Grupit Numërues nëpër fletë votime gjatë procesit të numërimit? Shikoni në të majtë anëtarin e Grupit të Numërimit në Vendin e Numërimit të Votave në datën 26 prill 2021.
Pamjet janë nxjerr nga videoxhirimet zyrtare të KQZ-së. Edhe për këtë rast ankesa është depozituar mbrëmë në KQZ/KAS.
Të merren menjëherë masa nga KQZ-ja dhe organet e drejtësisë! Zgjedhjet janë të pavlefshme, duhet vajtur në rivotim!
Tiranë, 11 maj 2021
Lëvizja VETËVENDOSJE!
Qendra në Shqipëri
