Kryetarja e LSI-së, Monika Kryemadhi ka vizituar disa nga familjet e prekura në Laç, nga tërmeti i 26 nëntorit.
Përmes një postimi në Facebook, Kryemadhi tregon se i është bashkuar lutjeve të qytetarëve për viktimat e këtij tërmeti në Kishën e Shën Mhillit.
“Në atë sallë kishte shumë solidaritet. Qytetarët ishin shumë më pranë me njëri-tjetrin, se në çdo të diel tjetër. Lutjet ishin për viktimat e tërmetit dhe për t’i dhënë forcë gjithkujt që është përballur me këtë fatkeqësi, atyre që janë të plagosur, familjarëve që kanë humbur të afërmit dhe atyre që iu janë shkatërruar shtëpitë”, shkruan Kryemadhi ndër të tjera.
Postimi i plotë:
Sot, pas disa takimeve me familjet e prekura nga tërmeti në Laç, mora pjesë edhe në meshën e së dielës, të mbajtur në Kishën e Shën Mhillit.
Në atë sallë kishte shumë solidaritet. Qytetarët ishin shumë më pranë me njëri-tjetrin, se në çdo të diel tjetër.
Lutjet ishin për viktimat e tërmetit dhe për t’i dhënë forcë gjithkujt që është përballur me këtë fatkeqësi, atyre që janë të plagosur, familjarëve që kanë humbur të afërmit dhe atyre që iu janë shkatërruar shtëpitë.
Shqiptarët gjatë shekujve janë vënë në provë nga shumë fatkeqësi, por ata ia kanë dalë t’i kalojnë sfidat me të cilat janë ndeshur, duke iu gjendur në krah njëri-tjetrit, me besimin në Zot dhe me dashurinë për jetën.
Sot më shumë se kurrë është koha të jemi pranë gjithkujt, që ka nevojë. Të kthejmë besimin te Zoti dhe te vazhdimësia e jetës.
Sot nga kjo fatkeqësi natyrore jemi të gjithë të prekur. Ndaj së bashku me përkrahjen për familjet në vështirësi reale për të sotmen dhe të ardhmen, duhet të sjellim shpresën për të gjithë shqiptarët.
Besimi te një Shqipëri të mirë dhe prospere edhe pa këtë tërmet ishin shumë të lëkundura. Ndaj ky solidaritet i jashtëzakonshëm, kjo forcë e madhe shpirtërore duhet të jetë një pikë kthese për të gjithë.
