Kohë më parë, drejtuesi i emisionit “Zonë e Lirë”, Arjan Çani, ka bërë një deklaratë shumë të fortë. Gjatë debatit në studio, moderatori Arian Çani tha se i gjithë Ballkani ka qenë helen.
“Ballkani ka qenë i gjithi helen. Ballkani ka qenë i gjithi helen, të tjerat janë përralla”, është shprehur Çani. Pas kësaj deklarate ka patur shumë reagime në rrjetet sociale, ku ndër to ka qenë dhe reagimi i këngëtares Rovena Stefa.
Nëpërmjet një postimi në Facebook, këngëtarja shkruante se bojkoti ndaj emisionit të tij është minimalja që mund të bëhet, madje e ka quajtur moderatorin edhe antishqiptar.
Kjo çështje është rikthyer sërish në fokus nga këngëtarja e mirënjohur. Teksa ka qenë e ftuar në emisionin “Glamour Zone” në RTV Ora, Rovena Stefa tha se nuk ishte penduar dhe së asgjë nuk është thënë në gjaknxehtësi e sipër.
“Jo, unë nuk kam asgjë me Çanin, kam qenë edhe e ftuara e tij. Nuk kam folur vetëm unë për Çanin, kundra deklaratave për helenikët. Në vende të tjera, për deklarata të tilla, njerëz publik përfundojnë në burg. Foli në një mënyrë të tillë, duke përçmuar vendin, duke përçmuar historinë tonë, dhe kjo më preku, ndaj dhe reagova ashtu”.
Rovena Stefa më pas u shpreh se një person publik, nuk duhet të shprehet në mënyrë të tillë, atij ose duhet t’i mbyllet emisioni ose të marr një gjobë.
E pyetur nga moderatorja nëse do të shkonte sërish në emisionin “Zonë e Lirë”, këngëtarja u përgjigj: Jo, jo, nuk do të shkoj më tek Çani. E kam mbyllur me Çanin. Unë vetë e kërkova bojkotimin e emisionit.
Përderisa e kërkova për të tjerët, normalisht që nuk kam si shkoj unë. Shpresoj që Zoti t’ia mbyllë sa më shpejt (qesh). Nuk dua të keqen e Çanit, por për atë gjë që ka bërë, ose duhet të mbajë përgjegjësi, ose duhet t’i thotë ‘më fal’ të gjithë shqiptarëve.
