Një sherr që nisi për djalin e tij degradoi deri në përdorimin e armës. Shtetasi 49-vjeçari Agron Mehmeti qëlloi me armë zjarri në drejtim të fëmijëve dje në Shkodër. Ngjarja, fatmirësisht pa viktima ka ndodhur rreth orës 18:00, në qendër të qytetit të Shkodrës, kur lulishtja dhe pedonalja ishin plot me njerëz.
Sherri ka nisur, pasi djali i 49-vjeçarit, rreth 13 vjeç, është konfliktuar me një fëmijë tjetër dhe menjëherë në vendngjarje ka shkuar babai i tij, i cili ka qëlluar me pistoletë, raporon “BalkanWeb”. Plumbi ka përfunduar në një prej lokaleve aty afër, por fatmirësisht nuk ka kapur asnjë person. Autori Agron Mehmeti ka qëlluar një prej fëmijëve me qytën e pistoletës dhe më pas është larguar me biçikletë në drejtim të paditur. Ndërkohë, autori është vetëdorëzuar ditën e sotme në polici, ku dhe është arrestuar.
Policia thotë se autori i dyshuar kishte shkuar tek fëmijët që po luanin, për të sqaruar një sherr të tyre me djalin e mitur të tij.
Më pas, i dyshuari nxorri pistoletën dhe qëlloi në drejtim të një 13-vjeçari. Fatmirësisht, plumbi nuk kapi askënd, por përfundoi në vetratën e një lokali. Në tokë policia gjeti një gëzhojë. Grupi hetimor ka sekuestruar kamerat e sigurisë së lokalit dhe të shkollës që ndodhet aty pranë.
