“Më pak korrupsion nënkupton humbje më të vogël të të ardhurave dhe një kualitet më të lartë në infrastrukturë dhe edukim. Frenimi i korrupsionit gjithashtu përmirëson besimin e përgjithshëm publik ndaj qeverisë”, theksohet nga hulumtimi i FMN-së.
Rreth 1 trilionë dollarë mund të gjeneroheshin çdo vit nëse lufta ndaj korrupsionit do të ishte efikase. Përveç rritjes së të ardhurave të qeverisë, frenimi i korrupsionit do të sillte gjithashtu edhe një rritje të rezultateve në shkollat publike, transmeton REL.
Pikat më të nxehta dhe më problematike të cilat mund të jenë lehtësisht të aksesueshme për korrupsion, sipas studimeve të mëparshme janë industritë siç janë minierat dhe ato të naftës, por nuk ngelen pas prokurimi edhe administrimi i ndërmarrjeve shtetërore.
Fondi Monetar përqëndrohet në transparencën dhe mbikëqyrjen si elementë kryesorë në frenimin e korrupsionit në këto fusha.
“Ajo që na habiti është se efekti i transparencës është shumë më i fortë në vendet që kanë një media të lirë ose një shoqëri civile të fuqishme”, sqaroi Paolo Mauro, zëvendës drejtor në Fondin Monetar Ndërkombëtar, Departamenti i Çështjeve Fiskale.
Fondi bën thirrje për profesionalizimin e shërbimit civil, duke përfshirë punësimin në bazë të meritave, si dhe nevojën për rregulla të thjeshta tatimore, sipas tij kjo do të sillte frenim më të shpejtë të korrupsionit. Një ndër rekomandimet e këtij raporti është fakti se teknologjia ka mundësi të luftojë korrupsionin. Hulumtimi jep edhe një shembull, siç është zbatimi i prokurimit online e parë si një mënyrë më e lirë dhe e shpejtë e luftës kundër korrupsionit.
