Lufta ndaj koronavirusit, aktualisht “armikut” më të madh të njerëzimit vijon, ndërkohë ditën e sotme pritet që të zhvillohet një hap galopant (i stërmadh).
Sot në SHBA do të bëhet testi i parë tek njerëzit i një vaksine kundër koronavirusit.
BBC raporton se një grupi prej 45 vullnetarësh të shëndetshëm do t’u injektohet vaksina në Institutin Kërkimor Kaiser Permanente, në Seattle.
Vaksina e injektuar nuk mund të shkaktojë COVID-19, por përmban një kod gjenetik të padëmshëm të kopjuar nga virusi që shkakton sëmundjen.
Sa kohë do të nevojitet për të zbuluar nëse vaksina është efikase apo jo?
Sipas ekspertëve do të nevojiten disa muaj për të parë nëse vaksina është e efektshme.
Dr John Tregoning, ekspert për sëmundjet infektive në Imperial College London, UK, deklaroi: “Kjo vaksinë përdor teknologjinë para-ekzistuese. Ajo është bërë në një standard shumë të lartë, duke përdorur gjëra që ne dimë se janë të sigurta për t’u përdorur tek njerëzit dhe ata që marrin pjesë në testim do të monitorohen shumë ngushtë. Është shumë herët, por është një garë kundër virusit, jo kundër njëri-tjetrit si shkencëtarë dhe po bëhet për të mirën e njerëzimit”.
