Ambasadorja amerikane Yuri Kim, ka vlerësuar me një çmim Gledis Nanon, drejtor i Anti-Terrorizmit në Policinë e Shtetit Shqiptar. Ambasada Amerikane bën me dije se Nano është vlerësuar për bashkëpunimin dhe përkushtimin e tij në mbështetje të përpjekjeve të përbashkëta për të luftuar terrorizmin global.
Njoftimi
Më 17 gusht, Ambasadorja Yuri Kim dorëzoi një Çmim Vlerësimi për Gledis Nano, Drejtor i Anti-Terrorizmit në Policinë e Shtetit Shqiptar. Çmimi e vlerësoi Z. Nano për bashkëpunimin dhe përkushtimin e tij në mbështetje të përpjekjeve të përbashkëta të Ambasadës Amerikane me Policinë e Shtetit Shqiptar për të luftuar terrorizmin global. Ambasadorja Kim nënvizoi gjithashtu edhe bashkërendimin dhe bashkëpunimin e tij me të gjitha çështjet e Ambasadës për zbatimin e ligjit dhe ato kundër terrorizmit.
Gledis Nano bashkë me kolegun Indrit Doda u dekoruan nga ish-ministri Sandër Lleshaj në dhjetor 2020, me Medaljen e Trimërisë pas futjes në kampin Al Hol dhe Roj të Sirisë ku identifikuan dhe riatdhesuan disa gra e fëmijë shqiptarë.
Kush është Gledis Nano, drejtori i Anti-Terrorizmit që mban një profil të ulët mediatik
Gledis Nano u emërua në detyrën e kreut të drejtorisë të Antiterrorit që prej 17 shkurtit 2016, pas një pune të gjatë dhe eksperiencë 17-vjeçare si pjesë e Policisë së Shtetit.
Gjatë të gjithë karrierës, Nano ka kryer detyra të ndryshme në polici, ku ka pasur rezultate në zbulimin e ngjarjeve të rëndësishme.
Në vitin 2013 ka kryer hetimet e dosjes se “Imamëve” të arrestuar për terrorizëm, ngjarje e cila ka pasur shumë jehonë si një nga më të suksesshmet në këtë fushë në të gjithë rajonin. Gledis Nano po ashtu drejtoi të gjithë operacionin sekret të dëbimit të diplomatëve iranian nga Shqipëria.
Për vetë postin e rëndësishëm që ai mban në krye të Antiterrorit shqiptar, Gledis Nano është trajnuar gjatë të gjithë karrierës së tij nga agjencitë më prestigjioze ligjzbatuese perëndimore dhe në 2017-n, është diplomuar në Akademinë Kombëtare të FBI në Quantico Virginia.
Për vetë natyrën e punës sensitive që bën me ekipin e tij, Gledis Nano ka mbajtur një profil të ulët mediatik e publik. /Tirana Today
