Nënkryetari i LSI-së, Luan Rama ka folur para medieve pas mbledhjes së grupit parlamentar të kësaj partie.
Deputeti tha se LSI do të vendosë pro kërkesës së Prokurorisë së Krimeve të Rënda për heqjen e imunitetit të Tahirit, gjë që i hap rrugë arrestimit të këtij të fundit.
FJALA E LUAN RAMËS:
Grupi parlamentar i LSI rithekson qëndrimin e vet parimor ligjor dhe në përputhje jo vetëm me moralin politik, por edhe me aspiratën e qytetarëve që presin nga kuvendi qasje që respekton ndarjen e pushteteve, autoritetin kushtetues të drejtësisë, prandaj ne do të votojmë pro miratimit të kërkesës së prokurorisë për t’i çelur rrugën çdo veprimi që i shërben hetimit të paanshëm dhe zbardhjen e të vërtetës në lidhje me grupin e strukturuar kriminal.
Nuk jemi para një individi, por përballë veprimit të një grupi të organizuar. Grupi parlamentar i LSI-së jo vetëm distancohet, por e dënon qartë dhe prerë sulmin politik si një përpjekje për ta devijuar fokusin e drejtësisë te qëndrimet të kompromentuara të shumicës parlamentare.
Seanca e të mërkurës do të dëshmojë kush është pro reformës në drejtësi dhe kush është kundër.
I bëjmë thirrje prokurorisë t’i shkojë deri në fund hetimeve.
