Analisti Lorenc Vangjeli ka hedhur ‘shashkën’ e radhës sot në ‘Opinion’, referuar deklaratave të forta të Metës. Ai tha se deklaratat ‘bombë’ të Kreut të Shtetit me Ambasadën e SHBA-së, nuk janë për Gjykatën Kushtetuese.
Ambasada Amerikane propozoi sot që debatin për ngërçin Kushtetues, palët ta dërgojnë për mendim tek Komisioni i Venecias.
Vangjeli tha se nuk beson që të jetë propozimi i SHBA, shkaku i përplasjes me Metën. Teksa tha se shkaqet duhen gjetur diku tjetër, ai refuzoi të jepte një pistë për këto përplasje.
“Kjo është një krizë politike, dhe zgjidhja e saj vjen me mjete politike. Po flasim deri tani për atë që duket. Presidenti deri tani na ka treguar formën, por jo përmbajtjen e kundërvënies së tij ndaj SHBA.
Thelbi i përplasjes nuk është kjo, është diçka tjetër të cilën ne nuk e dimë për momentin. Shkaqet duhet të jenë të tjera. Nuk e di, refuzoj të spekuloj mbi këtë gjë. Reagimi i parë në këtë mënyrë është proporcional. Në këto ditë do fillojmë të shikojmë shkaqet e vërteta të kësaj përplasje”, u shpreh analisti Vangjeli.
