Ministrit i Brendshëm i Francës, Gerard Collomb premtoi atashimin pranë Policisë Shqiptare të dy oficerëve të specializuar në luftën ndaj grupeve kriminale dhe pastrimit të parave, krahas atyre të ardhur nga SHBA dhe Gjermania. Collomb u shpreh gjatë takimit se krimi nuk ka nacionalitet, por është transnacional, e në të implikohen shtetas të ndryshëm nga vende të ndryshme. Kjo sipas tij, imponon krijimin e një marrëdhënie të re mes vendeve, në këtë luftë.
Ministri Collomb zhvilloi një takim me homologun shqiptar Xhafaj në kuadrin e marrëveshjeve dhe bashkëpunimeve mes dy ministrive. Duhet theksuar se ky takim në kryeqytetin shqiptar vjen pas dy të tillëve, mbajtur në Paris, në muajt Korrik dhe Nëntor të këtij viti.
Collomb deklaroi gjatë takimit të dy delegacioneve se mbetet për t’u zgjidhur, së bashku, çështja e flukseve migratore, përfshi minorenët e pashoqëruar. Çështja e migracionit të paligjshëm, u shpreh Collomb, kërkon zgjidhje nga të dy palët. Edhe rregullat që janë sot në fuqi në Francë, kanë nevojë për përmirësim, shtoi ai. Procedurat për azil në Francë marrin shumë kohë dhe aktualisht ka një vakum juridik, e cila dikton nevojën e reformimit në këtë aspekt.
Në fund të takimit të dy delegacioneve, ministrat firmosën marrëveshjen administrative “Për forcimin e bashkëpunimit policor operacional dhe pritjen e punonjësve të Policisë shqiptare në mision në Francë”.
