Ministri i Brendshëm, Sandër Lleshaj është shprehur se kanë nisur hetimet ndaj protestuesve që hodhën molotov në protestat e organizuara nga opozita jo parlamentare.
I ftuar në emisionin “Java”, Lleshaj deklaroi se kishte kryer një sondazh me drejtuesit e policisë, dhe sipas tij asnjëri prej tyre nuk dinte të prodhonte një bombë molotov, ndërsa shtoi se bombat janë financuar dhe transportuar në mënyrë të drejtpërdrejtë.
“Kam bërë disa sondazhe me drejtuesit e policisë. I kam pyetur kush nga ata dinte të bënte molotov dhe asnjëri nuk më tha që dinte.
Tani kush nga protestuesit e thjeshtë mund të prodhojë molotov? Molotovi është organizuar në mënyrë të drejtpërdrejtë.
Është financuar dhe transportuar në mënyrë të organizuar. Di që policia ka nisur hetime për personat që i kanë krijuar dhe transportuar”, tha Sandër Lleshaj.
Po ashtu, ministri foli dhe për efektivët që ushtruan dhunë ndaj sekretarit organizativ të Partisë Demokratike, Sahit Dollapi në protestën e 11 majit. Sipas ministrit, Drejtoria e Standardeve ne polici ka zhvilluar një hetim për këtë ngjarje, por nuk ka konstatuar ndonjë shkelje te ligjit.
“Është zhvilluar një hetim nga Drejtoria e Standardeve, por nuk di që të ketë pasur masa”, deklaroi Lleshaj.
